Në kuadër të edicionit të tretë të Ditëve të Hapura të Laboratorit 2025, grupi “The ECOPLAYERS” prezantoi një projekt inovativ dhe kreativ, të dizajnuar në formën e një loje strategjike interaktive. Ky projekt synonte të rrisë ndërgjegjësimin për çështjet mjedisore që ndikojnë drejtpërdrejt në qytetin tonë të Prishtinës, duke i paraqitur ato në një mënyrë sa më të kuptueshme dhe tërheqëse për pjesëmarrësit.

Gjatë procesit të zhvillimit, ato krijuan një lojë strategjike që simulon situata mjedisore të jetës reale, duke i kthyer sfidat e përditshme në skenarë të bazuar në lojë. Loja zhvillohet duke hedhur zarin dhe duke lëvizur në një tabelë me hapësira të ndryshme. Çdo hapësirë përfaqëson një situatë të caktuar mjedisore, ku lojtarët mund të marrin shpërblime ose të përballen me penalitete, në varësi të ndikimit pozitiv ose negativ të veprimeve të tyre.

Përmes kësaj loje, sfidat reale mjedisore transformohen në një përvojë interaktive dhe edukative, ku lojtarët jo vetëm që argëtohen, por edhe mësojnë për pasojat e vendimeve të tyre. Prandaj, objektivi kryesor i mekanikës së lojës është të theksojë rëndësinë e veprimeve të qëndrueshme dhe ndikimin që individët kanë në komunitet dhe në mjedis.